Øyhopping

Øyparadis Bulandet Værlandet

Reis med buss over den nye vegen, Nordsjøporten, mellom Bulandet og Værlandet, der 6 bruer bind dei mange øyane saman. Ein rundtur for deg som vil ha med deg alt! Turen kan takast enten frå sør via Krakhella, eller frå nord via Askvoll, og korresponderer med ekspressbåten til/frå Bergen.

Kjem du frå sør med ekspressbåt til Krakhella, så går turen vidare med buss til Hardbakke, kommunesenteret i Solund. Bussen stoggar ved hamna, og der ligg "Stjernsund" klar til å ta deg med på postbåtruta mellom øyane i midtre Solund. Turen går stort sett i roleg farvatn og vi passerer trange sund og mange små øyskattar. Er vi heldige kan vi sjå både nise, kobbe og havørn! Båten stoggar der det er postlevering eller passasjerar som skal av den aktuelle dagen, men er ofte innom Lågøy, Litle Færøy, Ytrøygrend og Indrøy. Postbåten er sjølve livsnerva for busetnaden på æyane, og knyter saman øyane med kommunesenteret. Sist på den ordinære postruta ligg det idylliske fiskeværet Gåsvær vest i havet.

På Gåsvær bur det i dag 14 fastbuande sommarstid. Folket her livnærer seg av fiske, skyssbåtdrift, landbruk og turisme. I tidlegare tider var her stor aktivitet med fiske etter laks, krabbe og hummar, og samling av ærfugldun. Jamvel eiga skjenkestove hadde Gåsværsamfunnet på den tida! I dag er Gåsvær ein eksotisk idyll for feriefolk og fiskeinteresserte, og kan huse opptil 20 gjestar i særprega ferieleiligheiter. Anne Marie Gåsvær Færøy og familien ynskjer velkommen med enkel informasjon, og har kaffi og litt å bite i til sals for dei som ynksjer det.

Etter Gåsvær tår turen vidare over eit stykke ope hav til Bulandet i Askvoll kommune. Her har du god tid til å rusle rundt på lett kuperte og asfalterte vegar. Du kan ta turen opp på Halsøhågen og få deg eit overblikk over øyane, vitje Bulandet Temapark med utsillinar frå Bulandet i fortid og notid og ta deg eit godt måltid må Pernillestø eller på kaféen i butikken. Heilt her vest i havet er det også kunstutsal, der du kan handle med deg eit minne fra øyturen om du har hug til det. Om du har lyst å vere litt aktiv, så kan du leige deg sykkel enten på butikken i Bulandet eller Værlandet, og sykle den nye vegen, Nordsjøporten, som sår mellom Bulandet og Værlandet. Her er også fleire fine turløyper om du ynskjer å gå ein tur. Elles går turen vidare med buss til Værlandet, og deretter med ferje frå Værlandet til Askvoll, og frå Askvoll med ekspressbåt tilbake til startpunket.

Ein eigen dagsturfaldar for Bulandet og Værlandet losar deg oversiktleg og trygt mellom dei ulike stadane. Denne tek du med deg frå båten, ferja, turistkontoret eller butikkane i Værlandet og Bulandet.

 >
Vis Øyhopping Solund-Bulandet-Værlandet i et større kart

SOLUND

Solund er øykommunen som ligg lengst vest i Noreg. Dette er også den einaste reine øykommunen i Sogn og Fjordane. Folketalet ligg i dag på rundt 900 og tyngda bur på hovudøyane Sula og Ytre Sula. Fiskeri er den største næringa i kommunen, medan Solund Verft er den største enkeltverksemda med sine 58 tilsette, inkludert leigearbeidarar og driv innan slippsetjing, vedlikehald, ombygging og reparasjon av skip. Solund er populær blant båtturistar med sin spanande skjærgard, og lokkar også mang ein friluftsglad og fiskeinteressert turist hit. Kommunen kan også skilte med dei vestlegaste øyane i Noreg, Utvær, eit populært dagsturmål i sommarsesongen.

GÅSVÆR

Gåsvær er ei av dei ytste øyane i Nord-Solund, og ligg vest i havet mellom Lågøyfjoden og Gåsværosen. Gåsvær ligg lagleg til fiskefelta og har truleg hatt handel i lang tid tilbake. I 1767 var her både gjetgjeveri og skjenkestove. Det siste århundret har folket livnært seg med fiske og jordbruk, og i vår tid også skyssbåtdrift og turisme. Den eldste delen på det særmerkte hovudhuset er frå 1700-talet, medan ein annan del er bygd av tømmer frå ei seglskute.

BULANDET

Bulandet er eit av dei mest livskaftige fiskevære i landet. I motsetnad til mange andre småsamfunn har folketalet her hatt ei positiv utvikling dei seinare åra. I dag er det om lag 270 fastbuande, som i hovudsak livnærer seg av ei moderne fiskerinæring. Bygda har mange servicetilbod, deriblant landets vestlegaste kiropraktor, galleri, kurs og samlingar i havkajakk. Sommarstid er Bulandet ein ynda stad for båtturistar og feriefolk i hytter og rorbuer. Namnet Bulandet kjem fra dei mange sjøbuene som var her.

VÆRLANDET

I Værlandet bur det ca. 200 innbyggjarar. Fiske og oppdrett er dei viktigaste næringsvegane, men reiseliv og eksport av høgkvalitets naturstein (grønsteinbreksje) til Italia, er næringar i vekst. Nordsjøløypa er ei merka turløype tvers over øya. Sideløypa til utsiktspunktet Høgkletten er merka og sikra med kjetting. Værøyhamna er karaktisert ved sitt pittoreske sjøhusmiljø, og i Sørværet Naturreservat er det eit myldrande dyreliv der du på ein heldig dag kan sjå både sel, oter, nise, ørn og hjort. Likar du å vere aktiv er det fleire fine turstiar på Værlandet, og her er også vegen kort til den majestetiske Alden, også kalla den Norske Hesten, ein topptur midt i havgapet som gir deg eit fantastisk panoramautsyn.

PÅMELDING (NB- må skje seinast dagen før):

Stiftinga Jensbua tlf. 57 73 90 20, eller MS "Stjernsund" tlf. 97 79 59 89, epost: stiftinga@jensbua.no