Hyllestad

Koordinatar: 61°10′N 5°18′E

Grunnleggjande opplysningar
Kommunenr: 1413
Fylke: Sogn og Fjordane
Administrasjonssenter: Hyllestad
Flatevidd: 259 km²
Folketal: 1 474 (2009)
Politikk
Ordførar (2007-2011): Tore Bråstad (Sp)
Målform: Nynorsk
Nettstad: www.hyllestad.kommune.no
Folketalsutvikling 1951-2008


Hyllestad er ein kommune i Sogn og Fjordane fylke.

Hyllestad ligg ytst på nordsida av Sognefjorden.

Kjennemerke

Hyllestad har den siste tida vorte kjent for kvernsteinproduksjon, ein industri som var i drift i nesten 1000 år. Kvernsteinsproduksjonen vert for tida granska av folk frå Universitetet i Bergen.

Lihesten, eit landemerke på vestlandskysten er det høgaste fjellet i kommunen


Næringsliv

Industri, landbruk og sjøbruk har vore grunnlag for størsteparten av sysselsettjinga i Hyllestad. Hjørnesteinsverksemda er båtverftet Havyard Leirvik.


Kommunesoge

Hyllestad kommune vart skipa i 1862 ved at Hyllestad og Øn sokn vart skilde ut frå Askvoll kommune og slegne saman med Bø sokn frå Lavik kommune. Ved skipinga budde det 2475 personar i Hyllestad kommune. I 1888 vart garden Krakken med 17 innbyggjarar overførd frå Hyllestad kommune til Solund kommune.


Hyllestad sokn og prestegjeld


Hyllestad er eit kyrkjesokn og prestegjeld i Ytre Sogn prosti. Prestegjeldet vart danna i 1861 av sokna Hyllestad og Øn som vart overførde frå Askvoll prestegjeld og Bø som vart overførd frå Lavik prestegjeld. Fram til 2001 var det tre sokn i Hyllestad prestegjeld, Bø sokn, Hyllestad sokn og Øn sokn, men då vart dei tre slegne saman til eitt felles Hyllestad sokn. Det er tre kyrkjer i soknet og prestegjeldet; Bø kyrkje frå 1868 på Bø ved Bøfjorden, Hyllestad kyrkje frå 1880 i Hyllestad sentrum ved Hyllestadfjorden og Øn kyrkje frå 1958 på Sørbøvåg på nordsida av Åfjorden.