Kystmuseet er ei avdeling av stiftinga "Musea i Sogn og Fjordane". Museet har hovudbase i Florø med tre moderne museumsbygg i eit 74 mål stort friområde. Museet ligg i eit variert kystområde bunde saman med spaservegar og bruer. Langs vegen gjennom området blir det bygd eit frilandsmuseum med tilflytta hus - både gardstun, tettstad og fiskevær. Her ligg mellom anna Bataldebua - ei saltebu frå 1800-talet.

Kystmuseet ligg i og har samla inn lokalt materiale frå eit gamalt kulturlandskap: den atlantiske lyngheia som stekkjer seg frå Lofoten og nedover på begge sider av Nordsjøen og langs Biscaya til Portugal. I dette landskapet voks det fram ei livsform som mange framleis kan kjenne seg att i på heile den lange strekninga der lyngheia framleis blømer.

Hovudhusa inneheld administrasjon, eit godt fagbibliotek, arkiv og ikkje minst fagfolk som står til teneste for publikum. Utstillingane viser m.a. lokale båttypar, fiskeri, fraktefart, interiør i ein fiskarheim på byrjinga av 1900-talet, lokal fauna og ei av dei største permanente oljeutstillingane i landet. Kystmuseet ynskjer alle velkomen til å vitje samlingane på museet.

Besøkande som kjem med eige buss køyrer inn Brendøyvegen og stopper ved avkøyrsla til Kystmuseet. Det er så 300 meter å gå (bussane er for store til å køyre heilt fram). Besøkande som kjem med rutebåt kan ta ringbussen frå rutebilstasjonen, 300 meter frå hamna. Ringbussen går kvar heile og halve time, og bruker ca. 15 minutt til Brendøyvegen. Derifrå er det ca. 800 meter å gå til Kystmuseet. Same retur. Kystmuseet ligg ca. 2 kilometer frå sentrum av Florø, dvs. ca. 30-40 minutt gangtid.