Med fleire hundre merka turløyper er det mange flotte fjellturar langs kysten. Her finn du alt frå krevjande heildagsturar til lettare fotturar for familien. Her er dei 10 beste i regionen! 

 

Lihesten, Hyllestad

Foto: Håkon Haukøy. 

Spektakulære Lihesten (777 moh) er eit kjent landemerke på kysten og sannsynlegvis eit av dei mest fotograferte fjella i regionen. Lihesten har eit nettverk av turstiar og du kan bruke fleire dagar på å utforske dei. Fjellet er også populært blant fjellklatrarar. Ein rundtur til dei mest besøkte toppane på fjellmassivet tar omtrent 8 timar.

TURBESKRIVELSE (Ein veg)
Tid: Dagstur
Høgd: 777 meter over havet
Lengd: 5,4 km
Sesong: April til September
Gradering: Svært krevjande

 

Alden, Askvoll

Foto: Kieran Kolle. 

Alden reiser seg 481 meter opp av havet, og er eit kjent seglingsmerke langs Norskekysten. På grunn av si særprega form er Alden kjent som ”norskehesten”. Utsikta frå toppen er storslått!

TURBESKRIVELSE (Ein veg)
Tid: 1,5 time
Høgd: 480 meter over havet
Lengd: 2,6 km 
Sesong: Heile året
Gradering: Middels

 

Hornelen, Bremanger

Foto: Sara Marie Ytreøy. 

Bestig Europas høgste sjøklippe! Turen opp er krevjande og tidvis bratt, men belønninga er ei storslått utsikt! Frå toppen av Hornelen kan du nyte panoramautsikt til det varierte og vakre landskapet med høge fjell, tronge fjordar og øyar i havgapet. Om du tør, kan du leggje deg ned på kanten og sjå rett ned på båttrafikken – 860 stupbratte meter under deg!
 
TURBESKRIVELSE (Ein veg)
Tid: 4/5 timar - avhengig av kvar du startar 
Høgd: 860 meter over havet
Lengd: 
Sesong: Mars til Oktober
Gradering: Svært krevjande

 

Brandsøyåsen, Florø

Foto: Truls Kleiven. 

Med over 40.000 turgåarar i året er Brandsøyåsen (286 moh) i Florø det mest populære turmålet i Sogn & Fjordane. Det er fleire stiar til toppen og du kan gå frå sentrum av Florø. Frå toppen er det storslått utsikt til den flotte naturen som omgir Norges vestlegaste by!

TURBESKRIVELSE (Ein veg)
Tid: 30 min. til 1 time -  avhengig av kvar du startar
Høgd: 286 meter over havet
Lengd: 2,1 km
Sesong: Heile året
Gradering: Lett til Middels

 

Skålefjellet, Askvoll

Foto: Gustav Skaar

Skålefjellet byr på fantastisk utsikt 767 meter over havet! Det går fleire ruter til toppen av Skålefjellet, og fjellet er lett tilgjengeleg både frå aust, sør og vest.
 

TURBESKRIVELSE (Ein veg)
Tid: omlag 2,5 timar
Høgd: 767 meter over havet 
Lengd: 6 km
Sesong: Mai til Oktober
Gradering: Middels krevjande 

 

Pollatinden, Solund

Foto: Hildur Ytreøy.

Solund er eit vakkert øyrike med meir enn 1700 øyer, holmar og skjær. Pollatinden (541 moh) er den nest høgste toppen i kommunen og byr på fantastisk utsikt over dei vestlegaste øyane i Norge.

TURBESKRIVELSE (Ein veg)
Tid: 1-2 timar 
Høgd: 541 meter over havet
Lengd: 2,2 km
Sesong: Heile året
Gradering: Middels krevjande

 

Store Batalden, Kinn

Foto: Rodrigo Cordova. 

Store Batalden (495 moh) er det høgste punktet på øyane som omkransar Florø. Frå toppen kan du nyte utsikta over skjergarden med eit mylder av øyar. På Store Batalden er det også kunstgalleri, museum og overnatting i historiske bygningar.

TURBESKRIVELSE (Ein veg)
Tid: 1,5 time opp
Høgd: 492 moh.
Lengd: 4 km
Sesong: Heile året 
Gradering: Middels

 

Veten, Måløy

 Foto: Torill Monsen

La deg forføre av vakker utsikt 613 meter over havet. Veten er det høgste punktet i Vågsøy, og dannar saman med Brurahornet bakgrunnen for byen Måløy. Start turen ved Måløy stadion. Her kan du enten parkere ved stadion eller følgje vegen vidare opp til vannverket nedanfor Skramsvatnet. Nyt utsika over store delar av Vågsøy og Stadhavet frå toppen

TURBESKRIVELSE (Ein veg)
Tid: ca. 1 time
Høgd: 613 meter over havet
Lengd: 4 km

Sesong: Heile året 
Gradering: Middels 

Hanekammen 

Foto: Torill Monsen 

Hanekammen ligg 652 meter over havet og byr på vakker utsikt over heilt Vågsøy, Stadthavet, innover langs Nordfjorden samt delar av Bremangerlandet. Turen startar ved å svinge av ved butikken på Deknepollen. Køyr deretter 500 meter og ta av mot høgre. Følg vegen til toppen av byggefeltet, ta til venstre og parker langs vegen etter ca. 100 meter. Herfrå finn du ein gruslagt bakke med eit skilt som peiker mot Hanekammen. 

TURBESKRIVELSE (Ein veg) 
Tid: 1 time, 30 minutt 
Høgd: 652 meter over havet 
Lengd: 5,2 km 

Sesong: Februar - November 
Gradering: Middels

 

Ramnenipa

 

Med sine 232 moh har Ramnenipa ein fantastisk utsikt over Hardbakke og Solund. Løypa har grøn gradering og passar til både born og vaksen. Den mest brukte vegen er ved fotballbana på Hardbakke. Frå butikken går du opp Storehaugen og gjennom gaten til du kjem ut på ein grusveg. Her tar du til venstre og går langs med fotballbana. Her finn du ein sti som tar deg heilt opp på fjellet. Du kan gå opp eller ned frå sør og nord sida.

TURBESKRIVELSE (Ein veg) 
Tid: 1 time 
Høgd: 232 meter over havet 
Lengd: 3,4 km

Sesong: Heile året
Gradering: Enkel