Båtferie

På fine sommardagar er godt å vere på båtferie i øyriket langs FjordKysten. Tusenvis av øyar gjer at du kan ferdast trygt i skjerma farvatn langs det meste av kysten. Gjestehamnene ligg tett og dei tek i mot deg på beste måte. Du finn også mange fine uthamner du kan ligge i når det freistar mest. Gled deg til aktive dagar på sjøen og avslutt gjerne dagen med gode matopplevingar i restaurantane våre.

Vi har laga ei eiga brosjyre for deg som er på båtferie. I Kystguiden finn du kart med oversikt over mange gjestehamner langs kysten. 

Gulen, Solund, Bulandet og Værlandet er som skapt for padling med tusenvis av øyar. Er du glad i å gå på tur kan du oppleve nokre av Norges mest spektakulære toppturar. Gå på Alden – den norske hest (481 moh) i Askvoll eller ta turen på Europas høgste sjøklippe Hornelen (860 moh) i Bremanger, utsikta er fantastisk. Vil du gå turar i lettare terreng kan du gå f.eks. ei av Nordsjøløypene, som du finn langs heile kysten.

Er du glad i å fiske bør du prøve fiskelukka og dra i land ferske godsaker frå havet.

Ta deg ein tur på sykkel langs lett kuperte og lite trafikkerte vegar. Du kan leie sykkel mange stader. Er du glad i strandliv må du ikkje gå glipp av dei lange kvite sandstrendene våre. Nyt fine sommardagar på paradisstrendene Grotlesanden og i Vetvika. Gå i spora etter vikingane og besøk Gulatinget, tusenårsstaden i Sogn og Fjordane, eller Kvernsteinsparken i Hyllestad.

Om sommaren kan du bli med på omvising til Kinn eitt  av Norges eldste pilegrimsmål. Du kan også besøke eit av dei flotte fyra langs kysten. Ta turen til Utvær og besøk Norges vestlegaste fyr. Opplev fiskeværet Kalvåg eller småbyidyllen i Florø. I Florø kan du mellom anna få omvising på Kinn Bryggeri eller besøke Kystmuseet.

Det skjer mykje langs kysten heile sommaren. I Florø kan du oppleve Kinnaspelet og vere med på verdas lengste sildebord akkompagnert med musikk midt i juni og leike deg i det våte element på ”Våt Moro” i juli. Er du glad i festivalar bør du få med deg Utkant på Skjerjehamn i juli og kystfestivalen i Kalvåg i august.