Fiske

Regionen er eit eldorado for sports- og hobbyfiskarar. Her kan du fiske både i sjø, elv og vatn.

Sjøfiske

Omgitt av ope hav og fjordar i Norges vakraste skjergard er forholda perfekte for sjøfiske, året rundt. Her kan du fiske makrell, sei, torsk, hyse, lange, krabbar og kreps. Om du kastar snøret djupt nok kan du også få kveite og breiflabb på kroken! Vinterfiske er ei heilt spesiell oppleving, og det er ofte då ein får dei største fiskane på kroken. Visste du at det er om vinteren skaldyr er best?

Fiske har alltid vore viktig for samfunna langs kysten. Her fins det framleis tradisjonelle fiskevêr og øyar der fiske er den viktigaste inntektskjelda for innbyggjarane. Her finn du hytter, rorbuer og sjøhus som har lagt forholda spesielt til rette for fiskeferiar. Desse ligg like ved sjøen og har tilgang til gode båtar og fasilitetar for preparering og oppbevaring av fangsten. Du kan også bli med ein lokal fiskar på guida fisketur og få tips om dei beste fiskeplassane. Fleire av overnattingsstadane tilbyr guida fisketurar på førespurnad.

Tryggleik på sjøen

Vêret langs kysten kan skifte brått. Sjekk alltid vêrmeldinga og hugs å ta med varme klede og nødvendig tryggleiksutstyr før du legg ut på fisketur.

Innlandsfiske

Flekke- og Guddalsvassdraget i Fjaler strekkjer seg om lag 30 km frå Flekkefjorden til fjellet i Guddal og har god bestand av laks og sjøaure. Vassdraget med alle vatna både i hovudvassdraget og i fjellet og naturen omkring gjev høve til mange flotte naturopplevingar. Huseklepp Fiskeskule i Guddal tilbyr kurs og guida fisketurar. Det er fleire overnattingsbedrifter nær vassdraget som har tilrettelagt for innlandsfiske med sal av fiskekort og eigna fasilitetar.

Bremanger og Flora har gode forhold for innlandsfiske. I Bremanger er det meir enn 100 fiskevatn. Fiskekort får ein m.a. kjøpt på servicekontoret og informasjonskontora i kommunen, Svelgen Hotell og fleire av daglegvarebutikkane i kommunen.

I Flora finn ein Osenvassdraget, som med 44 km med elvar og fiskevatn har lange tradisjonar innan lakse- og ørretfiske. I området kring Storebru er der gode forhold for ferskvassfiske og moglegheit for overnatting både på campingplass og i feriehus. I Norddalsfjord er det mange flotte fiskevatn. Fiskekort i Flora kan du kjøpe på SMS. Informasjonsskilt er sett opp ved vatna.