Kystmuseet i Sogn og Fjordane

Om

Sjå glimt av dagleglivet ved kysten - frå steinalder til oljealder! På Kystmuseet i Florø finn du ei stor båtsamling og gjenstandar frå bygd og by ved kysten. Her kan du besøke ei av dei største oljeutstillingane i landet og prøve å evakuere frå ei "oljeplattform"! Museet ligg i eit vakkert kystområde bunde saman med spaservegar og bruer. Her kan du puste inn den friske havlufta medan du spaserer mellom gamle sjøbuer og gardstun. På sommaren kan både små og store helse på dei søte geitene som er på beite like ved museet. 

KJEKT FOR BÅDE SMÅ OG STORE
På Kystmuseet kan barna utforske livet langs kysten. På sommaren kan dei bli med på Barnas Kystmuseum! Her kan barna lage krabbesnøre, ta seg ein rotur og mate geiter. Gjennom heile året kan barna l​​​​ære om kystkulturen og ha det gøy samtidig!

Museet har 3 utstillingsbygg som formidlar natur- og kulturhistorie frå kysten av Sogn og Fjordane. Lurar du på korleis Florø by var til? På museet kan du lære om framveksten av kystbyen frå 1860 og fram til i dag. På utstillinga kan du sjå velkjende element frå fest og kvardagsliv i byen - mellom anna ei spisestove frå ein handelsmann på 1920-talet. Livet på kysten er og synt fram i ei interiørutstilling med inventar frå ein fiskarheim rundt år 1900.

SKIFTANDE UTSTILLINGAR
I tillegg til faste utstillingar har Kystmuseet har stadig skiftande tema- og kunstutstillingar i auditoriet. Flora Kunstlag er fast samarbeidspartnar og nyttar lokalet til sine utstillingar. 

REISE TIL KYSTMUSEET
Kystmuseet ligg ca. 2 kilometer frå sentrum av Florø - om lag 30 minutt gangtid. Det går bybuss frå rutebilstasjonen i sentrum (300 meter frå hamna) om lag kvar heile og halve time. Den bruker ca. 15 minutt til Brendøyvegen og derifrå er det ca. 600 meter å gå til Kystmuseet. Privatbilar kan køyre via Brendøyvegen heilt fram til parkering ved utstillingshallane. Frå Florø sentrum følgjer du skiltinga i retning flyplassen til du ser skilt med "Kystmuseet" på. Grupper som kjem med eigen buss, kan køyre til bussparkeringa i Båtevika og gå gangstien gjennom uteområdet fram til museet. Alternativt kan bussen setje av gruppa ved avkøyrsla til museet i Brendøyvegen. Derifrå er det 100 meter til inngangen.