Ting å gjere

FjordKysten har mange spennande aktivitetar å by på - heile året. Naturkreftene er kraftfulle her i havgapet, der fjordane møter storhavet i vest. Landskapet og naturen har blitt forma gjennom tusenvis av år og byr på store variasjonar innanfor korte avstandar. Dette gjer at vi kan by på eit stort utval av aktivitetar - både på, under og over havoverflata.

På land kan du boltre deg i mektig og urørt natur. Det er eit stort utval av fjell- og fotturar i regionen. Høgdepunktet er Hornelen, som med sine 860 stupbratte meter over havet er Europas høgste sjøklippe. Har du lyst på ei lettare utfordring, finn du varierte turløyper i alle vanskegrader over heile regionen.  

Tusenvis av øyar langs kysten gjer området til eit eldorado for kajakkpadlarar. Nybegynnarar kan padle i skjerma farvatn mellom dei mange øyene, mens for dei som vil surfe på bølgjene er vegen ut på storhavet kort. 

Regionen har ei rik og spennande historie, med spor heilt tilbake til steinalderen. Her finn du to av dei største helleristningsfelta i Norge - Vingen i Bremanger og Ausevika i Flora kommune. Vikingtida har satt sine spor i området, og i dag kan du besøke Gulatinget i Gulen og Kvernsteinsparken i Hyllestad. I Rivedal står statuen av Ingolf Arnarsson, grunnleggjaren av Island. I Florø kan du besøke Kystmuseet, som viser uviklinga av kystkulturen i området - frå sildefiske til oljeutvinning. 

Vêret på kysten skiftar fort og du kan oppleve fleire årstider på ein og samme dag. November-februar er høgsesong for stormturisme. Då kan du oppleve vêr, vind og bølgjer i trygge rammer og samtidig nyte det gode liv med komfortabel overnatting og gode matopplevingar. 

Velkomen til små og store eventyr langs FjordKysten!