Storm

Vinteren langs FjordKysten er ei mild og stormfull oppleving, kombinert med eit fantastisk vinterlys. November – februar er høgsesong for stormturisme!

Av og til blir det kaldt vêr med snø, men det er heller sjeldan på våre kantar, og når snøen kjem ligg den aldri lenge. Vindfulle dagar har vi derimot mykje av! Regionen er det mest stormfulle området i Sør-Norge, og det byr på spektakulære naturopplevingar.

Stormturisme handlar om å oppleve vêr og vind i trygge rammer. Nokre dagar er klare og solrike, men som regel er stormfullt vêr rett rundt hjørnet. Å sjå bølgjene slå mot land frå eit utsiktspunkt i havgapet er eit fasinerande syn. Det milde klimaet gjer at du kan gå mange flotte turar året rundt. Når du treng ein pause frå ruskevêret kan du besøke lokale galleri og museum. Eller kva med ein tur på spa?

Om vinteren er FjordKysten på sitt mest romantiske og spesielle, og det er fantastisk å ta seg nokre dagar fri for å oppleve naturkreftene. Det å bu godt er ein viktig del av opplevinga. Fyr i peisen, kryp under teppet og nyt varm drikke i koppen saman med dine nærmaste. Fisk og skalldyr er på sitt beste om vinteren, og våre restaurantar byr på matopplevingar av ypparste klasse. Overalt møter du eit godt vertskap - det røffe kystklimaet vårt står i sterk kontrast til dei hyggelege folka som tek imot deg.